Mali Ako. Mali ka. Malisya.

Nakapasok ka na ba sa motel?

Tricky question yan. Dalawa ang pwedeng sagot. Una, pwedeng may malisya. Green meaning. Pangalawa, pwedeng out of curiosity yung tanong. Depende pa yan sa nagtatanong, yung paraang ng pagtanong at kung paano yung pagkaka-deliver ng tanong. Ngayon, kung medyo mahalay ang utak mo, puwede mong gawing biro ang sagot. Play safe. Pero kung dedepende ka sa tono ng tanong, nasa sa’yo na kung paano mo ito sasagutin ng walang ibang meaning.

Ang salitang ‘motel’ ay shortcut ng ‘motor hotel’. Hotel ito na matatagpuan sa mga roadside para sa mga motorista na galing sa mahahabang roadtrip. Kumbaga sa bus, stop over pero mas mahaba ang oras dahil madalas nagpapalipas ng gabi ang mga nagtse-check in dito para magpahinga. Usually ang mga kwarto nito ay nakahilera sa mababang building na may parking space direkta palabas ng kalsada.

Yan ang tunay na meaning ng motel.

Pero dahil ang generation natin ngayon e masyadong advance at futuristic, ang motel ay isang salita o simbulo ng makating utak.

(Wag ka na magpanggap. Alam kong madalas mong ginagamit na joke ang salitang motel lalo na kung tungkol sa sex at kabit. Nangunguna na dyan yung kulay pulang building.)

Naitanong ko yan kasi napapansin kong kakaiba tayo magbigay ng meaning sa mga alanganing tanong. O sitwasyon, mga ganung-ganung bagay ba lalo na sa kasarapan ng kwentuhan, sa tapat ng isang bote ng beer. Sinabi kong kakaiba kasi madalas nauuna ang negative comment natin bago i-analyze ang lahat ng detalye para sa mas simpleng komento, kesa sa komplikadong pagsagot nang hindi muna inaalam kung paano o bakit. Nagbibigay agad ng conclusion ang utak base sa kung paano nito bibigyan ng mas cool o makabuluhang sagot ang isang makahulugang tanong, na madalas lumalagpas sa simple at payak na sagot na ewan kung bakit nagiging weird pagdating sa mahalay na usapan.

Mas mautak ba talaga tayo pag green ang pinaguusapan?

Pagusapan natin ang malisya. Halimbawa, si boy ay inaya si girl na manuod ng sine. Close friend sila. Parehong single. Walang malalim na relasyon o history ng kalaswaan. Bored lang talaga si boy at walang magawa sa pera kaya naisipang manuod ng sine, pero dahil mas entertaining kung may kasamang girl kaya inimbitahan nito si girl na close friend naman nito. Pumayag si girl. Nanuod ng sine. Kumain sa labas. The end.

Yun lang yun. Kumain at nanuod lang sila ng sine. Simpleng sagot. Pero dahil mahilig tayo magbigay ng meaning at malisya, hindi sapat ang “Kumain lang kayo? Weh?”.

Bakit ganun?

Simple. Hindi uso sa Pinas ang paglabas/pag-gimik/pag-gala ng opposite sex ng walang meaning o malisya lalo pa kung out of nowhere ang imbitasyon. Random ba. Senyales kasi ito ng unang hakbang ng ligawan. “Hindi ‘to date a! Kakain lang tayo sa labas, tapos nuod ng sine. Okey lang ba sa’yo?”.

Eto ngayon ang twist: ang malisya ay nasa mata ng magbibigay ng may malisya. Kanino? Nasa mata ng tatlong tao. Una kay lalake. Sige, isipin na nating ‘na-bored’ lang talaga si boy kaya nag-aya ito lumabas. Tanong: manunuod lang pala ng sine, bakit hindi na lang mag-isa ni boy? At bakit kelangang si girl lang, o si girl pa ang kasama, puwede namang kaibigang lalake (double meaning ulit pag same sex lumabas)? Or puwede ring group of friends na lang?

Pangalawa, si babae. Aminin na natin, may mga babaeng mabait at meron talagang malandi. Sa side ni babae, puwedeng ‘friendly date’ lang talaga ang pagpayag niya kay boy, tutal close friend naman sila. Ngayon, maaaring bigyan niya ito ng malisya kung may crush pala ito kay boy, na hindi alam ni boy. Maaaring isiping liligawan na siya nito, pero si boy e walang ibang intention kun’di gumala lang talaga dahil nga sa ‘boredom’. Maaaring may mga inimbitahan din si boy, pero sa kamalas-malasang pagkakataon, iisa lang ang umoo.

Pangatlo, yung mga makakakita. Sino-sino sila? Mga taong parehong connected sa kanila. Circle of friends. At ang pinakamasklap, kamag-anak. Natural, ano ang unang iisipin ng makakakita sa kanila?

Malisyoso 1: Nakita ko si Boy at Girl kagabi, magkasama sa mall!

Malisyoso 2: Talaga? Baka nagde-date na? Nag-holding hands ba?

Malisyoso 1: Hindi ko napansin p’re, pero parang kakatapos lang nila manuod ng sine nun. Sinundan ko nga e, dumiretso sila sa McJollibee. Ayun, kumain sila dun!

Malisyoso 2: Hala, baka nga nagde-date na sila! Mai-post nga!

Ganyan na ganyan din kung paano tayo mag-isip sa salitang ‘motel’. Kung tutuusin, ang motel ay lugar pahingahan, NOON. Pero dahil walang batas na pumipigil sa premarital sex at mura lang ang tumambay sa malamig na kwarto, magkakasundo ang utak ng mga malisyoso’t malisyosa sa pagkakataong pumasok ang dalawang tao, specially opposite sex, sa nasabing lugar.

Pero para sa mga defensive, wag muna mag-react. Sige, sabihin na nating ‘nagpahinga’ lang si boy at girl sa motel. Ang tanong: bakit kelangan sa motel pa, kung magpapahinga lang? Kung ikaw ba ang yayain na magpahinga sa motel, ano ba iisipin mo?

Wag kang plastik!

Para sa mga pilosopo, alam kong depende pa rin sa sitwasyon kung bakit hindi dapat bigyan ng meaning ang simpleng paglabas-labas ng opposite sex. Una, puwedeng mag-bestfriend sila. Walang malisya yun, mag-bestfriend e. Pero ano ba ang meaning ng mag-bestfriend sa ngayon, lalo na kung opposite sex?

1.       Nagkasundo lang sa isang bagay, naging mag-bestfriend na dahil sa kagustuhan nila. Ex: parehong trip ang koreanovela o k-pop.

2.       Mag-ex na ayaw mawalay sa isa’t isa kaya naging ending ang mag-bestfriend.

3.       Parehong M.U. pero parehong takot na ma-reject kaya pinandigan na lang na mag-bestfriend.

4.       Parang M.U.: less than lovers, more than friends, but with benefits.

Kita mo na? Pati ang pagkakaron ng bestfriend e may malisya pa rin?

Pangalawa, malay ba natin kung dati silang magkaklase na aksidenteng nagkita sa mall? O kaya magpinsan sila? O magkapatid? O kababata na wala talagang malisya?

Kung babasahin ang meaning ng malisya sa dictionary, negative act ito. “The intention or desire to do evil; ill will”. To do evil, wow. Parang gawaing demonyo. Ibig sabihin, lahat ng malisyoso e may tiket na sa impiyerno, ng walang bayad.

Kasi nga, pinagisipan natin agad ng hindi maganda. Kasi nga, hindi naman talaga ‘yun lang’ ang meaning ng pagde-date. Kasi nga, may iba pang intention si boy kay girl. Kasi nga, pareho kayong may nakataong sungay.

Oo, merong mga relasyong nagsimula dahil lang sa malisya. Hindi sadya. Hindi gusto. Nabigyan na lang talaga ng ibang meaning. Kung paano binigyan ng malisya, hindi ko alam. Tanong mo kay talong, monay, mani, hotdog, pasas at itlog. Mga inosenteng pagkain na binibigyan ng malisya.

Hindi lahat ng pumapasok sa motel, may ginawa ng…kakaiba. Hindi porke lumabas o nag-date si kwan at kwan, sila na. Hindi porke hinatid ka sa sakayan, nililigawan ka na. Hindi porke nilibre ka ng pamasahe, may crush na sa’yo. Hindi porke pinapadalan ka ng sweet-text-message-every-now-and-then, may gusto na sa’yo. Hindi porke inakbayan ka, closed na kayo. Hindi porke nagre-reply siya sa text mo, M.U. na kayo. At hindi porke t-in-ag ka sa status, may something na agad. Tandaan, meron lang talagang sadyang mabait, friendly at malandi. Either way, mahirap mag-assume.

(Magkano nga ulit pag three hours lang?)