Paano Kung Alien Si Juan?

Sa panahong kasama na sa schedule ng buhay ng tao ang magpapalit-palit ng status sa facebook, paulit-ulit na takbo ng istorya ng mga tele-fanta-korea-mexico-serye, walang humpay na pagbabago ng mga cellphone at kung ano-anong anik-anik, paghahanda ng ilan sa propesiya ni Nostredamus na 2012, may ilang mga taong naguubos ng oras at gumagastos ng milyong-milyon para magsaliksik at patunayan sa madla (o media) na meron talagang ‘alien’.

Kung base sa teorya ng tao ang salitang ‘alien’ katuwang ang iba’t ibang diksyunaryo, ensayklopidya o kahit na si Google, tumatalakay ito sa mga nilalang na ‘hindi’ sa earth galing o nagmula. Parang ibang lahi na tumira sa Pinas na walang permiso o walang kaukulang papeles na nagpapatunay na Pinoy siya kahit hindi siya marunong managalog. Trespasser at walang’ya.

Binabali kasi nito ang pilosopiya o paniniwala ng tao na ang tao ay ginawang perpekto dahil meron siyang:

1. 2 mata
2. 1 ilong
3. 2 tenga
4. 1 bibig (na may 1 dila at humigit-kumulang na 30 ngipin, depende pa sa tutubuan ng wisdom tooth at sungki)
5. kamay at braso (na may sampung daliri)
6. paa at binti (na may sampung daliri)
7. magkaibang maselang bahagi ni adan at eba
8. katawan na magkaiba rin kay adan at eba
9. utak
10. at iba pang internal organs

na samantalang ang madalas nating makita sa media o simpleng pelikula na ang imahe ng alien ay abnormal sa imahe ng tao. May alien na isa lang ang mata, 3 daliri, walong braso, walang tenga, singhaba ng edsa ang dila, ngipin na kelangang dumaan sa dentista, utak na sinlaki ng pakwan, balat na laging bagong ligo at kung ano-ano pang hitusra na hindi angkop sa paniniwala ng tao na dapat ‘ganito lang ang hitsura mo para matawag kang tao’. Madalas din silang tiwali sa paniniwala ng tao sa physics dahil sa hindi maipaliwanag na kakayahan o naging miyembro na sila ng X-men gaya ng sobrang taas ng talon, pandinig na umaabot hanggang 5 kanto (o higit pa), kuko na sintalim ng espada ni King Arthur, bumuhat ng isang trak ng basura, umihip na  kayang magpatuyo ng buhok ng isang nagmamadaling estudyante, boses na tatalunin ang speaker ng diskuhan, bilis ng kilos na kayang tapusin na ang walang humpay na paghuli kay road runner, at marami pang iba na sana meron din ako.

Pero wala pa rin namang patunay, kahit man lang video clip sa youtube na meron ngang alien (meron man, parang ang labo pa ring paniwalaan), o kahit saglit lang na interview kay Oprah. O kahit siya na lang ang kumanta ng Lupang Hinirang sa laban ni Pacquiao. Kung meron, bakit hindi nagpaparamdam sa Pinas? Mas madalas na sa states sila nagbabakasyon. Gaya ng Area 51 sa Nevada. Racist ba sila? Choosy? O nagkakaron muna sila ng survey kung saan mas magiging okey ang pag-landing ng UFO nila? Makailang beses na rin kasi akong nakabasa ng ilang artikulo o column sa mga tabloids na may namataang kakaibang sasakyang pamhipapawid na namataan sa bandang ganito sa Manila, o footprints na sinlaki ng paa ni Yao Ming, at kakaibang fossil ng mga hindi pangkaraniwang imahe ng tao sa hindi malamang lugar sa Pinas. At hindi rin naman big deal sa’ten kung magkaron man, dahil mismong mga alien ay tutuban ng phobia kung sakaling dito nila gugulin ang vacation leave nila. Baka nga maging biktima pa sila ng kidnap for ransom, at hindi malaman kung ano ang magiging kapalit dahil wala namang pera ni juan ang mga extra-terrestrial. At kung gumawa man sila ng video na napasakamay ng mga kidnapper ang mga alien, hindi ako sigurado kung may cable o antenna na abot galaxy ang planetang pinagmulan ng kawawang alien.

            Sa totoo lang, curious ako kung meron nga bang alien, katulad na rin ng tanong ng mga alien kung meron nga bang mga tao. At kung meron man, anong klaseng pamumuhay meron sila? Uso din kaya sa kanila ang salitang kurapsyon? Ano-ano ang pagkain nila? May mala-alien din kaya silang baboy o baka? May kinalolokohan din ba silang profile site? May EDSA din kaya sa kanila? Uso din kaya ang crab mentality sa kanila? Hirap din ba  sila sa langis? May minimum wage ba sila? Ano ang basehan nila ng kabayanihan? Paano ang parusang kamatayan sa kanila? May ‘respeto’ kaya sila? Holiday? Pista? Tuli? Paraan ng suicide? Makabuluhan ba ang blog nila (kung meron man silang internet)? May eleksyon din kaya? Gaano katagal? Paano ang proseso ng eleksyon at paraan ng pagpili ng iboboto? Noontime show? Game show? Walang kamatayang alien-novela? Sports? Alien dollar? O WALA SILANG PINAGIBA SA TAO?

            Madaling i-apply sa buhay ng tao kung asal-alien ka o hawig ka ng isang alien. Basta’t hindi ka naaayon sa batas ng imahe ng tao, alien ka. ‘Yun bang hindi kaya ni Ripley’s na paniwalaang tao ka, at sabog ang ideya ng siyensya sa hitsura mo. Nahahanay ka sa mga bagay na imposible at out of this world. Hindi ka normal. Kakaiba ka. Wala kang katulad at unique. Meron kang taglay na wala sa isang normal na tao. Panis ang talento sa’yo dahil inborn ka. Samakatuwid, hindi ka tao.

            Isang napakalaking PERO, hindi na kelangan pang magpadala ng kung ano-anong spaceship o samahan sila Optimus Prime sa pagtuklas ng ilang parte ng universe para lang maghagilap ng alien. Marami tayo niyan, nang hindi mo namamalayan kasi busy ka sa pagbabasa nito. Actually minsan napapanuod mo lang sila sa TV, o kaya nakatabi mo sa sinehan ng ‘di mo namamalayan. O nakainuman mo na rin, textmate o isa sa mga ‘friends’ mo sa facebook. Mas madalas silang makita sa diyaryo, tv, magazine, pader (lalo na pag eleksyon), at marami ang tulad nila sa Malakanyang. Sila ‘yung mga taong nabubuhay ng walang puso, walang konsensiya, walang modo, ubod ng talino, hindi tama ang pagiisip, maraming kalaban, hobby ang pagpapahirap, kulangot ang tingin sa masa, bihira tumayo dahil mas madalas nakaupo, dalawa ang mata pero nasa likod ang paningin, bingi sa sigaw ng mahihirap pero tumatalas ang pandinig tuwing eleksyon, nagiibang anyo ‘tuwing’ eleksyon, at nagta-transform tuwing nag-aabot ng mga relief goods tuwing may disaster. Ang boses nila ay gawa sa yero na pumupunit ng eardrum tuwing eleksyon. Ag salita nila ay madalas nating hindi maintindihan tuwing may anomalya sa gobyerno.

Kilala mo sila. Ikaw pa nga ang dahilan kung bakit nasa palasyo sila ngayon. Binoto mo kasi ‘sila’ kasi akala mo ‘mutant’ sila na anytime kaya nilang baguhin ang sistema ng Pinas. Ikaw din ang dahilan kung bakit ang mga karapat-dapat na mamuno ay nanghihinayang ngayon. Ikaw ang may sala kung bakit ang piso ay nanatiling piso. Ikaw din ang naging dahilan kaya nakahanay pa rin ang Pinas sa listahan ng mga manggagantso, manggagaya, palaisdaan ng puta at talamak na mga bagay na imoral. Sa madaling salita, wala tayong pinagiba sa mga alien.

(nga pala, panuorin mo ‘yung pelikulang ‘Paul’. Tungkol siyempre sa isang alien tapos… bahala ka na humusga. Comedy naman ‘yun kaya cool pa rin)