7 Deadly Sins Part 4: Gluttony

(PAUNAWA: ANG SUSUNOD NA BLOG AY MAY MASESELANG OPINYON NA HINDI ANGKOP SA MGA…MASISIBA. MALAWAK NA PANGUNAWA ANG KINAKAILANGAN. SORRY NA RIN SA MGA TATAMAAN IN ADVANCE)

Masarap ang junkfoods kahit hindi ko gusto ang unang salita sa “junkfoods”. Dahil kung walang katotohanan ang sinabi ko, hindi uulanin ng sangkaterbang ‘pagkaing-basura’ ang mga sari-sari store o groceries. Lahat na ng pwede nilang maisip na flavor na in the future e pwede mo ng gawing favorite hobbies, pulutan o ulam, naisip na nila. Ganyan sila kasigasig magisip sa ngalan ng satisfaction at happiness. Kung happiness mang maituturing yun sa karamihan.

                Kung literal man na junk ang kinakain naten, bakit hindi sa junkshop sila nabibili?

                Pero hindi naman kaila sa’ten na ilang porsyento ng bawat pirasong isusubo nateng tsitsiria eh may halong monosodium glutamate o simpleng vetsin (pati pala asin, sorry). At yun talaga ang rason kung bakit ang saaarrraaap-sarap nila papakin at gawing past time, kahit wala naman talaga tayong napapala. Lalo na yung mga tsistriang malalaki yung supot. Yung nabibili lang sa mga de-aircon na groceries.

                Yung iba naman, iba ang side effect sa utak ng masobrahan sa vetsin. Minsan ipagyayabang pa na presyong-ginto ang pinapapak. Hindi makakaligtas pati mga network site. Masabi lang sa status na “Watching “Ang Babae sa Bintana” with my ka-sosyalan while eating Super-Junk-Foods 2013! Yum yum!” na may kasama pang close-up photo ng nasabing tsitsiria. Gusto magpapansin na hindi kumikilala ng tigpi-pisong tsitsiria ang sikmura niya kaya dapat galing sa malalaking supot na may mahabang salaysay ng ‘nutrition facts’ ang kinakain niya, na ewan kung ano ang meaning nun sa katawan.

                Nutrition facts. Tunog healthy living. Pero kung tutuusin, hindi naman mahalaga sa’ten kung ano mang detalye ang ilagay ng mga nutritionist dun (bakit laging nasa likod nakalagay?). Hindi naman lahat, miyembro ng “health conscious society”. WALA tayong PAKELAM kung ano mang ingredients ang isasaksak nila sa mamahaling pagkaing-basura, basta ang mahalaga, makain sila ng consumers. At wala rin tayong pakelam kung meron o wala mang health benefits. Kaya hindi ko alam kung bakit kelangan pang maglagay ng ‘nutrition facts’, gayung alam na ng common sense of humor naten na isa lamang silang junk sa katawan. Yung nutrition na nabanggit, baka nakalagay mismo dun sa supot o plastik. O baka natunaw na sa taas ng porsyento ng asin at vetsin. Baka naman nasa resibo?

                Nung isang beses, sinubukan kong umubos ng isang balot ng junkfood habang nanunuod ng brutal at nakakadiring pelikula. Malaking junkfood na potato chips na in-export dito sa Pinas. Tapos yung tema ng pelikula, gore at brutal. Nakalimutan ko na rin yung title. Basta mala ‘texas chainsaw massacre’ na parang ‘wrong turn’. Bawat subo ko nun, para na rin may libreng ketchup na lasang dugo ang kinakain ko. Enjoy na enjoy naman si tanga habang nagmamantika ang nguso at daliri. Nang maubos, hindi pa nakuntento. Dinilaan pa yung ilalim na parte ng supot. Resulta? Bukod sa umay at limpak-limpak na kolesterol, sumakit ang ulo ko.

                Ang buong akala ko, dahil sa sigawan, tilaan, saksakan at habulan scene ang dahilan. Yun pala, tumaas ang sodium level sa katawan kaya sakit sa ulo ang side effect. Sumobra daw ako sa pagkonsumo ng pagkaing-basura kaya hindi na raw nagtaka ang doktor sa resulta. ‘Wag daw masyadong masiba sa ganung uri ng pagkain lalo na kung nagsosolo lang. Okey lang daw kung may ka-share. Kaya nirestahan niya ako ng bagong tsitsiria at uri ng pelikula na hindi dapat ikombinasyon. Love story pala dapat.

                Gusto ko sanang mag-react sa salitang “masyadong masiba”. Siguro nga, sinolo ko. E ano naman??? Sa pagkakaalam ko, wala namang nakalagay na warning sign sa kinain kong tsitsiria na “Government warning: Huwag kainin ng solo”. Hind rin naman ako binalaan ng cashier tungkol dun. Ang alam ko lang, naligo lang naman sa asin at vetsin ang kinain ko. Yun lang.

                Hindi ko na rin matandaan kung kelan ako naging masiba sa pagkain. Noong bata ako, siguro. Lalo na pag nasa harapan ako ng mesa ng handaan. Yun bang lahat ng pagkain na ma-target ng mata ko, dapat magkasya sa iisang plato. Yung tipong tatalunin lahat ng super value meals pati buffet. Hindi tuloy alam ng mga kamag-anak ko kung ano ba ang teorya ko sa tamang dami ng pagkain. Curious lang naman sila sa kasibaan ko dahil nung mga panahong yun, patpatin pa ang body figure ko. Madalas tuloy akong kainggitan ng mga taong iwas sa carbohydrates.

                Pero ngayon, hindi ko na magawa sa dahilang madali akong masuka. Kaya nagtitiyaga na lang ako sa affordable meals, dine in. May kasama pang take-out.

                Pag sinabing ‘masiba’, usually mga heavy-guts ang pinupuntong uri ng tao. Mga tipo ng tao na hindi kilala ang salitang ‘obessity’. Wala sa prinsipyo nila ang low carbs, diet, health living at malnutrition. Sila yung may paniniwala sa prinsipyong “Di bale ng malaki ang tiyan, basta pagkain ang laman.” At hindi naniniwala sa poverty. Pero ewan lang kung bakit minsan, may mga taong hindi makontrol ang sobrang konsumo ng pagkain.

                Pero may ilang masisiba na ang pigura ng katawan ay parang hindi kilala ang kanin at carbohydrates. Ang lakas kumain, pero hindi mo naman alam kung diretso ba sa hita at binti ang kinakain kaya parang hindi napupuno ang sikmura. Baka nga totoo na yung kasabihan na “may alaga sa tiyan”. Pero kung meron man, ano yun? Anong lahi? At bakit sa tiyan pa inaalagaan?

                Tingnan mo, nagawa nga ng mga eksperto na lagyan ng kung ano-anong ingredients ang mga masesebong pagkain para mabawasan ang side effects nito, pero hindi nila kaya lutasin ang patuloy na paglobo ng tiyan ng karamihan. Parang sinasadya nilang damihan ang problema at trabaho ng mga nutritionist, doktor at trainor ng mga gym. Patay-bahala. Hindi ko alam kung talagang sinasadya lang talaga nilang tuksuhin ang mga tao na maging ganap na masiba para lang dumami ang salapi nila.

                Mga masisiba sa kapangyarihan.

                Bakit hindi nila magawang gumawa ng sangkap na magpapasira sa appetite ng masisiba?

                Nabubuhay pa man din tayo sa henerasyon na ‘buy 1 take 1 burger’ sa ngayon.

At ito na ang paboritong tanong ni Juan: Sino ang kauna-unahang naging masiba sa mundo?

Eba: Badtrip ka naman! Inubos mo lahat ng mansanas na bigay sa’ken nung ahas! Ang siba mo! Sana lumaki yang tiyan mo na parang tatlong buwang buntis!

Adan: (Nag-pose na parang body builder) Hoy excuse me…hindi nakakalaki ng tiyan ang fruits! Hitsura mo!

                Paano na lang kung hindi lang isang kagat ng mansanas ang nagawa ni Eba? Paano kung isang buo? Paano kung siya ang unang nagkaron ng ‘bulimia’? Dadami pa kaya ang listahan ng kasalanan ng tao? Wala lang. Natanong lang.

                Alam mo ba yung ‘Binge eating disorder’? Compulsive overeating? E yung bulimia nervosa? Yung sakit ng tao na sobra-sobra kung kumonsumo ng pagkain? Hindi no? Ako rin e. Sa google ko lang nabasa. Parehas pala tayo, haha. Aakalain mo bang ‘disorder’ at sakit na ng tao ang pagkain ng limpak-limpak?

                Pati yun, talagang pinagubusan nila ng common sense of humor at samu’t saring research. Hindi ko alam kung gaano kalaki ang ginastos nila at kung gaano katagal sila nagsunog ng kilay gamit ang asin at vetsin. Nang magkasundo na sila sa teorya at nakagawa na ng conclusion na sila-sila rin lang naman ang nagkakaintindihan, na hindi na maganda sa paningin ng tao ang overweight at mga soon to be sumo-wrestler, ipinakalat na nila sa mundo na isa ng ganap na sakit ang pagkain ng sobra-sobra. Ang resulta, yung mga taong pakiramdam nila e normal lang ang pagkain ng marami, lalo pang na-stress. Lalo tuloy nag-panic buying sa pinakamalapit na groceries, diresto sa aisle ng mga junkfoods.

                Marami na nga ang nagugutom, maiisip pa ba ng ilan ang mga ganung disorders? Parang pang-mayaman lang ata ang ganung uri ng sakit.

                Pero ‘wag ka. Hindi lang sa pagkain sangkot ang usapin ng kasibaan. Para sa mga manginginom, applied to. Kaya ikaw na nagmumumog na alkohol, wala lang. Tuloy mo lang. Pag nagkasakit ka dahil sa kasibaan mo sa alak, saka mo na i-like ang blog na to.

                Masama ang sobra. At ang sobra ay…masama (huh?). Kahit naman tanggalin mo ang salitang ‘masama’, yung salitang ‘sobra’, hindi na maganda sa bokabularyo sa batas ng tao. Maganda lang i-apply ang salitang ‘sobra’ kung --- hindi lang iisang tao ang makikinabang. Dahil sa totoo lang, sa panahon naten ngayon na ang instant noodles ay isa ng uri ng ulam, daig ng sobra ang sapat.

                Ganyan tayo kahirap mga floyd.

                Anyway, hindi naman naten pwede ituro o sisihin ang mga taong sobra ang konsumo ng pagkain sa katawan. Bakit? Marami silang sobra. Sobrang pagkain, sobrang pera at sobrang pagkakataon na hindi lahat meron. Hindi lahat nakakaranas ng salitang ‘sobra’. At kahit ang salitang sapat, maalat pa sa MSG ng tigpi-pisong tsitsiria na maranasan ng karamihan.

                Teka, ano ba pinaglalaban ko dito?

Takdang-aralin:

1.       Bakit kaunti ang laman ng mga mamahaling tsitsiria kumpara sa mga tigpi-piso? Pangatwiranan.

2.       Ano ang kinalaman ng calories at carbohydrates sa inuman? Pangatwiranan kasama ang mga kainuman.

3.       Ipaliwanag kung bakit kelangang lagyan ng nutrition facts ang mga junkfoods. Magtanong sa cashier.

4.       Lahat ba ng kumakain sa ‘eat all you can’ restaurant, masisiba? Ipaliwanag mo ng maayos.

5.       Kung bibigyan ka ng pagkakataong maging masiba sa pagkain, anong uri ito at bakit? Ayusin ang katwiran.

6.       Sumulat ng sanaysay kung bakit dapat doble ang bayad ng mga taong matataba sa jeep o tricycle. Mag-sorry kung kinakailangan. Isulat ang pangalan at lagdaan sa bandang left-bottom ng likod ng papel. Lakipan ng alinman sa mga sumusunod na proof of purchase at ihulog sa pinakamalapit na groceries, nationwide:

-          20 sachet ng Super-Junk-Foods-2013 (Paksiw flavor) 20 gms.

-          20 sachet ng Sobraang Alaat Chips 20 gms.

-          45 sachet ng DinayaSaVetsin Chips 20 gms.

-          3 bottle cap ng Wasak Gin (any flavor) 120 ml.

-          3 crown ng SobrangSwabe Beer 30 ml

-          1 sako ng Sosyal-Ang-Rice-Mo-Ate! (tanggalin ang bigas)