Uy, Bad Words Yan!

Tutal lagi naman nating isinasama sa araw-araw na buhay ang mga salitang ito, bigyan ko na rin ng pansin para sa ikalalawak ng opinyon o pakahulugan naten sa dalawang salitang hanggang ngayon ay hindi ko alam kung paano napasama sa bokabularyo nating mga Pinoy. At kung bakit ang sarap silang isama sa bawat pangungusap na bibitawan naten.

(kung nasa edad 18 pababa ka at sagrado ang buhay mo, makabubuti na iwasang basahin ito para na rin sa kapakanan ng iyong dignidad… Pero kung isa ka sa naguubos ng oras katititig sa facebook, bahala ka na…)

Matagal ko ng tanong sa sarili ‘to. Kahit ang google at wikipedia kasi wala namang paliwanag sa dalawang salitang ito. Ikaw –-- sa tingin mo --- ano ang pinagkaiba ng salitang GAGO at TANGA?

Halimbawa:

“Kinain mo ‘yung panis na tocino?! GAGO ka ba?”

“Kinain mo ‘yung panis na tocino?! TANGA ka ba?”

“Parang GAGO ‘yung presidente. Parang walang alam…”

“Parang TANGA ‘yung presidente. Parang walang alam.”

“Tingnan mo ‘yung batang nangungulangot, parang TANGA ‘no?”

“Tingnan mo ‘yung batang nangungulangot, parang GAGO‘no?”

Ngayon, ano ang pagkakaiba ng dalawa?

Kadalasang maihahanay ang salitang “tanga” sa mga taong hindi nagiisip. Isang magandang halimbawa d’yan ay ang mga taong malinaw naman ang mata, nabasa naman ang babalang “HUWAG TUMAWID DITO. NAKAMAMATAY”, tumawid pa rin. Eto lang ah --- alam ba niya sa sarili niya na tanga siya o gusto niya lang ma-experience ang “nakamamatay” na babala? Naku naman, kahit ang hindi nakatuntong ng hayskul ay maiintindihan ang gustong ipahiwatig ng pagkalaki-laking babala. Hindi pa ba epektibo ang salitang “nakamamatay” para magdalawang isip ang isang taong tinatamad gumamit ng overpass? Eh kung i-edit kaya ng MMDA ang babala at gawing “TANGA KA ‘PAG TUMAWID KA SA NAKAMAMATAY NA KALSADANG ITO!”, tatawid ka pa kaya?

‘Yung mga taong gusto ng pagbabago at demokrasya pero bumoto ng tangang pangulo (Sali mo na rin ang ilang senador, congressman/woman, mayor, konsehal at kahit na kagawad lang), eh mas tanga. Wala ng mas tatanga pa sa taong naniwala sa isa pang tanga. Eto ‘yung mga taong ang daming reklamo sa buhay at madalas sisihin ang gobyerno pero hindi naman gumagamit ng sentido-komon tuwing eleksyon. Susme, kung tanga ang pangulo, tanga ang botante, tanga ang gobyerno, eh ‘di parang sinabi mo na rin na tanga ang Pinas!

‘Yung ilang mga pulitika na nagpapagawa ng kalye tuwing tag-ulan ay tanga; ang magyosi sa “non smoking area” ay inubos na ng nicotine ang utak dahil sa pagiging tanga; ang pagbayad ng sampung piso ng isang pasahero at tanungin ng driver kung “ilang” ay nuknukan ng tanga at wala ng mas tatanga pa sa ilang pulitiko’t pulitika na hindi alam ang salitang “kurapsyon” na talaga namang tinubuan ng katangahan sa utak.

Sa kabilang banda, ang gago ay isang salitang naglalarawan sa isang gawain na inalisan ng kahihiyan o ang mga makakapal ang mukha (“Gago ka, ba’t mo kinain ‘yung pigrolac?!”). Bagay dito ‘yung mga pulitiko’t pulitika na walang habas na nilampasan ang salitang “kurapsyon”. At mas bagay sa kanila ang itapon sa bulkan.

Tanga ang isang taong tumawid sa maling tawiran, pero gago ang isang traffic enforcer na sumenyas pa na bilisan ang kanilang pagtawid. Ang pangit ng kombinasyon. Kagaya na rin ng isang gagong isnatcher na ini-snatch ang cellphone ng isang tangang tao na alam na niyang pugad ng snatcher ang lugar pero proud na proud sa sarili na meron siyang mamahaling cellphone.

            Tanga ka na nga dahil nagyosi ka sa isang non-smoking area, eh pa’no pa kung nasa tabi mo na ang tapunan ng upos pero nilaglag mo pa rin sa paanan mo at basta mo na lang tinapakan? Gago ka p’re… no less.

            Ang pinagkaiba lang naman ng dalawang salitang ito eh ang paraan ng paggamit. At pwedeng isigaw, mapa-babae man o lalake; gago kay adan, gaga kay eba. Ewan lang kung tanggap ng lahat ang  salitang tange, na minsan na ring dinadagdagan ng “k” sa dulo para mas sosyal at mabawasan ang impact at epekto sa isang tao (“Bakla nalaglag ka sa kanal? Tangek ka talaga!”). Nag-evolve na rin ang salitang tangek sa salitang bekimon na “shongak” na halos 40% na lang ang epekto sa sinumang masabihan nito, samantalang ang gaga ay naging gagita na.

            Pero mga floyd, ang magkapatid na salitang ito ay kailanma’y hindi na maituturing na miyembro ng mga ipinagbabawal na salita. Mas pipiliin ko ng maging expression ang dalawang ito kesa sa P!@##$% INA, o ‘yung ilang maseselang parte ng babae. Alam na kasi ng isang tao kung galit ka sa tuwing masasabi mo ang mga salitang ito. Madaling intindihin. At sakop kasi nito ang kalimitang damdamin natin na nakatutulong para magpahayag ng hinanakit, galit, pagkabigla o minsan na ring pagkatuwa. At hindi ‘yan napipigilan tulad ng hindi inaasahang utot.

            Sa araw-araw na ginawa NIYA, kelan mo ba hindi masasambit, KAHIT ISA ang mga salitang ito? Makita mo lang ang mga nakahambalang na pagmumukha ng ilang mga pulitiko tuwing panahon (o hindi man) ng eleksyon, gago na agad sila. Tapos tanga ‘yung nagpaskil noon sa ipinagbabawal na lugar ng paskilan. ‘Yung jeepney driver na tanga magsukli. ‘Yung gagong pulis na nabubuhay sa kotong. Kaya wala na, gaguhan na talaga. Napapalibutan na tayo ng mga likas na tanga at gago. Epidemya na wala ng lunas. Kung meron man, kagaguhan na lang.

Kagaguhan ang pagkakaroon ng isang gobyernong tanga. Katangahan naman ang pagkakaroon ng pagbabago na hindi iniisip kung kelan at kung paano. Nasusunog na ang utak ng tao sa paghihimay ng ilan kung alin ba ang katangahan at kagaguhan, kaya p’re, ‘wag mo ng dagdagan pa.