Drink Moderately? Asa...

Lahat na lang ng bagay sa buhay ng isang tao ay papunta sa alak. Totoo ‘yan. At marami ng patunay diyan kahit ‘di ka gumamit ng google.

            Isa sa mga dahilan ng kawalan ng “abs” ng mga kalalakihan (lalo na sa Pinas) ay dahil na rin sa katakawan sa alak. Ang bawat oras sa isang araw ay maaring lakipan ng “drinking session”. Sinagot ka ng nililigawan mo, inuman. Gumradweyt ka (sa wakas!) ng hayskul o kolehiyo, inuman. Natanggap o napromote ka sa trabaho, inuman. Lahat ng holiday sa loob ng isang taon, inuman, isali mo na rin ang birtdey mo na umaabot ng ilang araw. Binyag, kasal, kumpil, reunion, gimik, simpleng pagtambay, panalo sa sugal, may bagyo, bagong gupit, bagong sahod, bagong taon, bagong pagawa ng pustiso o simpleng araw-tanghali-hapon-gabi-madaling-araw-na-walang-magawa ------ iNuMaN. AlAk. INumAn. INUman. ALak. AAAALLLLAAAKKKK!

Sa Pilipinas lang ata pwede ang sistemang inuman kahit saan. Na kahit nakaharang na kayo sa dinaraan ng mga tao, pipilitin nyo pa rin maglatag ng mesa at ilang bench na upuan magkaron lang ng kaunting salo-salo o selebrasyon. AT ‘YAN ay kahit anong oras, araw o okasyon man ‘yan, basta nagsimula na ang patak-patak at ambagan, presto!

Lingid na rin sa kaalaman ng lahat, ang simpleng inuman ay parang isang program sa iskul na nangangailangan ng ilang segment at opisyal. Tanggero? Hindi nawawala sa listahan. Isa sa pinakamabigat na tungkulin. ‘Yung para kang bangag sa drugs na dapat alerto ka sa kung sino na ang tatagay at marunong magdesisyon kung dapat ng taasan, babaan, bagalan o bilisan ang daloy ng tagay. Musical director. Ang bida sa videoke o tagalabas ng saliw na mga kanta ng E-heads o Parokya ni Edgar na gitarista. Story teller. Piiinnaakkaa-makwento at parang tabloid sa dami ng alam at tsismis. Muse. Ang “hidden pulutan” ng mga kalalakihan na walang ibang ginawa kun’di magpaganda, magmaganda, at magpacute na sa huli ay una din namang susuka. Stand-up comedian. Wala pa kong nasaluhang inuman na hindi naglabas ng joke kahit gasgas na. Aktor/aktres. Eto ‘yung tagabasag ng trip at agaw-atensyon kung magdrama na kulang na lang abutan mo ng trophy sa galing umarte. At manager. Ang special treatment sa lahat at “bossy”. Bawal utusan at dapat puro lambing at panguuto ang dapat gawin ‘pag kausap mo siya.

Ewan ko ba kung ano ang napapala naten sa alak at tuwang-tuwa tayo sa epekto nito. Bukod sa gastos, hindi maipaliwanag na lasa, hang-over at mitsa ng aksidente, wala naman talagang magandang nagagawa ang toma sa katawan ng tao, isantabi mo na ang kasiyahan, bonding, agaw-lakas loob sa panliligaw, alternatibong paraan ng pagkuha ng tulog, pag-headbang at dagdag na memorable moments mo. Noon, sumisimbulo lang ng selebrasyon ang paginom ng alak (hindi pa inuman ang term noon) at ginagawa lang ito pagtapos magsalo-salo, lalo na  nung panahon ni Lapu-Lapu. PERO NGAYON? Pwede ng ihilera sa mouthwash ang ilang brand ng alak. At minsan na ring dinadahilan para takasan ang problema.

Sa Germany matatagpuan ang To Georg Tscheuschner, ang pinakamatapang na beer at pinakamasagwang lasa na nagkakahala ng 100 Euro. Kung sa Pinas meron tayong sumisipa, sa Germany, meron naman silang nananadyak.

Alam naman naten na ang kasunod ng inuman ay ang parusa ng hang-over. Dahil sa ang alkohol ay lumilikha ng inflammatory chemical o “Cytokins” na mabilis iprodyus sa katawan ng tao, nagreresulta ito ng memory loss, kawalan ng pokus at sakit sa ulo (hang-over na ‘yan p’re…). Dito na papasok ‘yung oras ng pagsisisi at pagbabawas ng kasalanan, at minsang pagdarasal na rin. Na sana hindi ka na naginom. Na sana hanggang dalawang bote ka lang. Na sana umuwi ka na lang ng maaga at nanuod ng bold kesa napagastos ka sa isang bar. Na sana mawala agad ang sakit ng ulo mo matapos mong ibottoms up ang isang litro ng Sprite. Na sana hindi ka nagtakaw sa pulutan para hindi gaano makalat ng suka ang unan mo. Na sana pinigalan mo ang sarili mo pero huli na kaya nahalikan mo na walang sa oras ang babaeng gumanda lang sa paningin mo ng gabing ‘yon. Na sana natutulog ka ngayon sa maayos na kama kesa sa labas ng pintuan ng bahay nyo na kahit ang lamok ay iniiwasan ka.

Dahan-dahan ang epekto ng alak sa katawan ng tao. Pero depende pa rin ito sa bahay-alak ng isang tao. Pero para na rin sa kasiyahan ng lahat, heto ang ilang tips kung lasing ka na o dapat ka ng umuwi:

HENYO – sa mga oras na ito, eksperto ka na sa lahat ng larangan, mapa-pulitika man o relihiyon. etc. at gusto mong maipasa ang mga kaalamang ito sa mga ka-jamming mo. Mabilis na nagiging ensayklopidya ang utak mo at para kang sinasapian ng isang titser. Sa mga oras ding  ito ay lagi kang tama AT laging mali ang kausap mo. Sa kabilang banda, magiging interesante ang inuman dahil lahat kayo ay HENYO na, ng hindi nyo namamalayan

MISTER SUWABE – ang oras na para kang naliligo sa sex appeal at pakiramdam mo ay hanging-hanga sila sa’yo kaya panay ang ngiti mo at pagpapakyut. Pakiramdam mo ay makakausap mo ang lahat ng kainuman mong chicks at hindi ka mapapahiya sa kanila dahil swaabbee ka.

LUCIO TAN – wala ka ng ibang bukambibig kun’di kahambugan. Na nakahanda agad ang pera mo sa oras na isang bote na lang ang nalalabi. Na pakiramdam mo ay hindi ka nauubusan ng pera kaya “sky’s the limit” na ang inuman. At dahil sa mayaman ka, pupusta ka lagi sa anumang mapagtripan nyo at dahil sa HENYO ka ay alam mong lagi kang mananalo.

INVINCIBLE – matapos kang sapian ni Einstein, isa ka naman ngayong ganap na boksingero at walang maglalakas ng loob na patulan ka dahil malakas ka. At kahit sino, kaya mong hamunin, kahit ang barangay tanod. Maghahamon ka ng simpleng pustahan ng bunong-braso dahil LUCIO TAN ka na maraming pera at HENYO ka kaya alam mong matatalo mo sila.

INVISIBLE – ang huling kabanata ng pagkalasing. Sa mga oras na ito, lahat pwede mo ng gawin. Pwede kang sumayaw sa ibabaw ng mesa para magpa-impress at wala kang pakelam dahil hindi ka naman nila nakikita. Wala rin sa paningin ng mga kainuman mo ang sarili mo dahil pakiramdam mo hindi ka nila nakikita kaya bigla ka na lang nananampal. Mag-aala April Boy ka na sa gitna ng kalye at wala kang pakelam kung sintunado ka dahil wala namang nakakakita sa’yo, kahit mali ang lyrics mo, dahil sa HENYO ka kaya tama lang ang kanta mo.

(shot mo na! puro ka kwento…)