Eh Ano Kung Sikat Ka?

Iba na ang batayan ng pagsikat ngayon. Noon ‘pag gumawa ka ng maganda sa pamayanan mo o sa simpleng seksyon mo sa klase, sikat ka na. Kapag nakadiskubre ka ng isang bagay na dadagdag sa mabilisang proseso ng gawain ng tao, sikat ka. Makagawa ka ng imbensyon na magpapabuti sa buhay ng tao, sikat ka na. Makapag-platinum ang album mo, sikat na sikat ka na. Makapaguwi ka ng medalya sa Olympics, sikat ka na. makapagsulat ka ng aklat at bumenta na nauwi pa sa pagsasapelikula, sikat  ka na. Puro positibo ang paraan ng pagsikat. May inambag sa buhay ng tao at nakabibilib.

Si Pacquiao sumikat dahil sa nakakagimbal na suntok; si Michael Jackson sumikat dahil sa moonwalk; ang The Beatles sikat dahil sa lupit ng kanta at pagka-weirdo;  Si Jimi Hendrix dahil sa electric guitar at si Lady Gaga na wala sa katinuan manamit. Iba-iba ang paraan ng pagsikat, pero nakalista na sila sa history. Mapa-maganda man sa mata o naka-impluwensiya sa panahon naten ngayon, sikat sila. Famous. Astig. Nakakabilib at minsan nakakainggit. At may iilan na nakakainis at parang mas masarap silang ihalo na lang sa rekado ng sopas.

Pero iba na ngayon. Napapasin ko na ang “katangahan” at “kalokohan” ay nabibigyan din pala ng gantimpala para sumikat.

‘Tang ina sino ba ang hindi makakakilala sa dating Pangulo na sa loob ng S-I-Y-A-M na taon ay puro kurapsyon ang bokabularyo? Sa apelyidong Ampatuan na tinuring na mga pusa ang mga pinapaslang? Kay Jason Ivler na susme, nakagawa na nga ng kalokohan, may fan page pa? At sa dating action star na ngayon ay Bebe Gandanghari na?

Ang gobyerno naten ang mahilig sa pagpapasikat. At sa sobrang pag-idol sa kanila ay marami na ang nagsigaya sa kalokohan nila. Tutal d’on naman sila yayaman, papahawa na rin sila. Wala namang kwenta ang batas ng ‘Pinas eh. Wala namang nakukulong dahil sa plunder. Magtago ka lang ng ilang buwan sa ibang bansa, kakalimutan na nila ang kaso mo.  Abswelto ka na kasi hindi na sikat ang isyu mo. Ilang araw ka lang paguusapan, baka makalawa may iba na namang ituturong pulitika na gumawa ng kalokohan. Tapos pasa-pasa na. Sila-sila din ang naggagaguhan, mga naturingang edukado at taga-gawa ng batas.

Sa larangan lang ng fashion, napakalaki ng agwat ng batayan ng kasikatan kumpara noong panahon na betamax pa ang sikat kesa sa blue ray dvd naten ngayon. Noon basta bago ang suot mo, malinis kang tingnan, may relo kang galing pa noong huling Christmas party, magarang kotse na madalas sa mga action movie mo lang nakikita, plantsado ang buhok at pantalon, ayos na. NGAYON? Sikat ka kapag:

-        dalawa (o higit pa) ang cellphone mo na pareho namang walang load

-        nag-iinternet ka gamit ang notebook o laptop

-        sa sinehan mo pinapanuod ang bagong pelikula

-        tatak “Starbucks” ang kape mo

-        nakokornihan ka sa ukay-ukay

-        branded lahat ang suot mo

-        flatscreen ang tv nyo

-        kwarto mo lang ang de-aircon

-        kotse ang naghahatid sa’yo papasok ng paaralan o trabaho kahit 3 kanto lang ang layo sa inyo

-        may bakal ka sa ngipin

-        naisingit ka sa isang commercial sa tv

-        naging player ka sa isang game show

-        marami kang view hits sa YOUTUBE

Kung magpapasikat ka rin lang, ‘yung ikatutuwa na ng marami. O kaya marami ang makikinabang. Gaya ng mga artists na pati ikaw natuwa sa kanta nila, sa obra nila na pwedeng i-display sa museum na nadadalaw lang tuwing may field trip. Magimbento ka ng pagkain na tumatagal ng isang linggo sa sikmura ng mabawasan ang gutom ng mundo. Magtanim ka ng makabagong lahi ng halaman  o puno na mabilis ang paglaki ng madagdagan naman ang oxygen, isama mo na rin ang marijuana. Isang tableta ng gamot na tatapos sa lahat ng uri ng cancer at HIV. Hindi ‘yung bwaka-ng-inang-magpopost-ako-ng-video-ko-sa-YOUTUBE-na-kunwari-kumakanta-ako-para-sumikat-ako-kahit-alam-kong-para-na-pala-akong-tanga.

Isa pa ‘yang Youtube. Ang daming pinasikat. Hindi mo kelangan mag-audition o kumuha ng civil exam para dito. Ang kelangan mo lang eh computer (sarili mo man o nagrerenta ka), webcam at lakas ng loob na hinaluan na rin ng kapal ng mukha. Tapos mag-isip ka ng bagong gimik na sa tingin mo ay kaaya-aya sa paningin ng tao. ‘Yung kikilit kahit papano sa mata ng ilan kahit korni. Kung sariwang ideya, mas maganda. Mas magmumukha kang tanga, bahala ka. Basta ihanda mo lang ang sarili mo sa paglalakad at baka pagtawanan ka na lang ng iba na para kang laging may nakadisplay na kulangot sa ilong.

At ano-ano ba ang sumikat sa ganitog gimik? Magmula sa simpleng batang umiiyak dahil kay Justin bieber, sa mga bading na nagtatatalon sa kama dahil kay Venus Raj, sa 4 year old na batang naggitara ng Canon, sa pusang napagtripang tumahol at marami pang iba na mas magandang ihanay sa katangahan, papansin, kalokohan at O.A. Lahat na ng pagpapasikat, andun na. Dadaigin nito ang wikipedia at google sa dami ng pwede mong hanapin. Matindi ang engine search na ultimo tamang pangungulangot ay nakabroadcast.

Pero sabi nga nila, there’s always a price of fame.

Isa sa mga member ng Beatles, nabaril dahil sa kahambugan. Nagsuicide naman si Kurt Cobain sa rurok ng kasikatan. Lumiit ang mundo ni Michael Jackson na ultimo pagpunta ng grocery, parang concert niya. Labas-masok ng rehab si Lindsay Lohan at napagtripang magpakalbo ni Britney Spears noong mga panahon lumulubog ang career niya.

Sikat ka ngayon, ngayon lang. Baka bukas lang nasa kulungan ka na dahil sa pagpatay, o nasa rehab ka na dahil sa pagiging adik, o nagkukulong na lang sa kwarto dahil sa kahihiyan. Gusto mong sumikat, dapat alam mo rin ang kalalagyan mo.

Mga kapatid, wala namang batas para pigilan ang pangarap na pagsikat ng isang tao. Bukod sa sisikat ka na, dagdag income pa ‘yan. Pero anak ng pitong kubang lulong sa ecstacy, ‘wag mo namang gawan ng kahihiyan ang sarili mo. Sige, kumanta ka hanggang gusto mo kung sa tingin mo maganda ang boses mo. Sumayaw ka hanggang tubuan ka ng abs sa batok. Gumawa ka ng rap kahit tungkol lang sa pagpapapogi. Maggitara ka gamit ang tenga mo. O kumain ka ng hilaw na ampalaya, pero ‘wag na ‘wag kang magpapasikat ng dahil sa katangahan o sa tingin mo ay natatawa ka. Tandaan na ang nakakatawa sa iba ay nakakainis rin para sa iba.